#रेस्टॉरंट_स्टाईल_ग्रेव्हीज_प्रिमिक्सेस
रेस्टॉरंट स्टाईल ग्रेव्हीज प्रिमिक्सेस म्हणजे सोप्या भाषेत आपण हाॅटेल ला गेल्यावर ज्या चमचमीत, चटकदार आणि सुवासिक अशा पंजाबी भाज्या खातो, त्यापध्दतीच्या भाज्या व बिर्याणी झटपट बनवता येतील असे तयार मसाले.
बहुदा शाकाहारी पंजाबी भाज्यांसाठी हे पंजाबी ग्रेव्ही प्रिमिक्स वापरले जातात. Dehydrated powders म्हणजेच बाष्पी काढण्यासाठी उन्हात किंवा Dryer machine मधे सुकवलेल्या कांदा, लसूण, दुध, आंबा, आले, टाॅमेटोच्या आणि अशा प्रकारच्या पावडरी ह्यामधे वापरल्या जातात. तेलात परतून फ्लेवर्स आणि झायका वाढवणारे सात अख्खे मसाले ह्यात वापरले जातात. तीळ, खसखस सारखे पदार्थ थोडेसे भाजून पावडर करून वापरले कि घट्टपणा येतो तर मैदा किंवा काॅर्नफ्लाॅर वापरला जातो. काजू, मगज मस्त creamy and rich texture gravy व्हायला मदत करतात.
हवामान थंड असल्यास डब्यात भरून बाहेर ठेवल्यास देखील दोन-तीन महिने किंवा जास्त टिकतात. पण भारतीय सरासरी हवामानानुसार फ्रिजमधे ठेवणे उत्तम. सहा सात महिने व्यवस्थित टिकतील.
थोड्याश्या शिजवलेल्या, अर्धकच्च्या भाज्या आपण प्रिमिक्सेस सोबत वापरतो. नैसर्गिक रंग आणि संरक्षक वापरायची गरज नसते. प्रमाणे अगदी योग्य असावीत म्हणून टेबलस्पून (tbsp) आणि टिस्पून (tsp) साठी अगदी योग्य मापे असलेले चमचे वापरा.
पांढरी ग्रेव्हीसाठीचे प्रिमिक्स
चवीला गोडसर आणि सफेदसर रंगाची ग्रेव्ही
१. काजू १० ग्रॅम (1 tbsp)
२. दुध पावडर ३० ग्रॅम (3 tbsp)
३. मगजसरी २० ग्रॅम (2 tbsp)
४. गरम मसाला (१/२ tsp)
५. वेलची पावडर (१/२ tsp)
६. लसूण पावडर (१ आणि १/२ tsp)
७. कांदा पावडर (१ आणि १/२ tsp)
८. कसूरी मेथी (१/२ tsp)
९. मीठ (१ tsp)
१०. पीठीसाखर (१/२ tsp)
११. मक्याचे पीठ किंवा मैदा (१ आणि १/२ tbsp)
१२. तेल (२ tbsp)
१३. काळे मिरे पावडर (१/२ tsp)
१४. ७ खास अख्खे मसाले (१ तमालपत्र, १ दालचिनी तुकडा, १ काळी मसाला वेलची, १ बादियान, २ हिरवी वेलची, २ लवंग, ४-५ काळेमिरे)
१. एका पॅनमधे काजू, मगजसरी हलकेच भाजून घ्या आणि थंड झाल्यावर मिक्सरमधून फिरवून पावडर करा.
२. एक भांडे घेऊन त्यात प्रमाणानुसार दुध पावडर, काळे मिरे पावडर, काजू-मगजसरी पावडर, गरम मसाला, वेलची पावडर, लसूण पावडर, कांदा पावडर, कसूरी मेथी, मीठ, पीठीसाखर, मैदा किंवा मक्याचे पीठ हे सर्व घालून एकदम एकजीव मिसळून घ्या. हवे तर मिक्सरमधून एकदा फिरवा.
३. पॅन गरम करून त्यात २ tbsp तेल गरम करा आणि सात खास अख्खे मसाले, म्हणजेच १ तमालपत्र, १ दालचिनी तुकडा, १ काळी मसाला वेलची, १ बादियान, २ हिरवी वेलची, २ लवंग, ४-५ काळेमिरे एक ते दोन मिनिटे न करपवता परतून घ्या. रेस्टॉरंट स्टाईल ग्रेव्हीज सुगंधित करण्यासाठी ह्याचा खास वापर होतो. परतलेले हे सर्व अख्खे मसाले तेलासकट आपण मिक्स केलेल्या पावडर मधे घालावे व मस्त मिक्स करावे. आणि चांगल्या डब्यामधे भरून शक्यतो फ्रिजमधे ठेवावे.
आता हा पांढरी ग्रेव्हीसाठीचे प्रिमिक्स पॅक वापरून मलाई कोफ्ता कसा बनवायचा ते पाहूयात.
साहित्य:
१. पांढरी ग्रेव्हीसाठीचे प्रिमिक्स
२. एक किंवा दोन हिरव्या मिरचीचा खर्डा
३. २ उकडलेले बटाटे
४. पनीर १५० ग्रॅम
५. चाट मसाला पाव चमचा
६. मीठ
७. काळे मिरे पावडर अर्धा चमचा
८. धणा पावडर अर्धा चमचा
९. एका मध्यम टाॅमेटोची प्युरी
कृती पाहुयात:
१. वर दिलेल्या प्रमाणातील पांढरी ग्रेव्हीचे पुर्ण तयार प्रिमिक्स घेऊन त्यात एक कप दुध आणि एक कप पाणी घालून गुठळ्या होणार नाहीत असे नीट मिक्स करून बाजूला ठेवावे.
(Please note: हे प्रिमिक्स वापरून सहा ते सात जणांना पुरेल इतपत भाजी होते. तुम्ही तीन ते चार जण असाल तर अर्धे प्रमाण वापरा आणि दुध आणि पाणी मिश्रणदेखील फक्त अर्धा कप प्रत्येकी.)
२. कोफ्ता: पनीर, बटाटे, थोडासा हिरव्या मिरचीचा खर्डा, चाट मसाला, मीठ, काळे मिरे पावडर आणि धणा पावडर एकत्र करून अगदी मस्त मळून कोफ्त्याचे पीठ मऊसर बांधा. छोटे छोटे गोळे बनवा आणि काॅर्नप्लाॅर किंवा मैद्यामधे अलगद घोळवून तेलात तळून घेऊन बाजूला ठेवा.
३. पॅनमधे थोडेसे तेल घालून त्यात मिरचीचा खर्डा टाकून परतून घ्या.
४. टाॅमेटो प्युरी घालून ३-४ मिनिटे ती व्यवस्थित शिजू द्या.
५. बाजूला ठेऊन दिलेले प्रिमिक्सचे दुध-पाण्यातले मिश्रण पॅनमधे ओता आणि एकजीव करा. आणि १०-१५ मिनिटे शिजवा. मधेमधे चमच्याने ढवळत रहा म्हणजे गुठळ्या होणार नाहीत.
६. आता अलगद आपण बाजूला बनवून ठेवलेले कोफ्ते ग्रेव्हीमधे सोडा आणि सुगंधित चविष्ट मलाई कोफ्ता सर्व्ह करण्यास तय्यार!
कुलचा, रोटी किंवा जीरा राईस बरोबर आस्वाद घ्या.
ह्याच पध्दतीने ह्या प्रिमिक्सपासून मेथी-मलाई-मटार आणि नवरतन कोफ्ता (निरनिराळ्या भाज्या, काजू, अनारदाणे आणि अननसाचे तुकडे), शाही कोफ्ता (मधले सारण म्हणून मनुका+काजू किंवा चीझ) अशा पंजाबी भाज्या बनवता येतात.
#ready_mix_gravies#gravies_punjabi_style#malai_kofta#laxmi_masale#the_masala_bazaar#spice_blends
